जळगाव । नंदुरबार, जळगाव आणि धुळे जिल्ह्यांच्या राजकीय वर्तुळात चर्चेचा विषय ठरलेल्या कथित ऑडिओ क्लिप प्रकरणात भाजपचे माजी प्रदेश महामंत्री विजय चौधरी यांना नंदुरबार पोलिसांनी अटक केली आहे. काही दिवसांपासून ते फरार होते. स्थानिक गुन्हे शाखेच्या पथकाने त्यांना ताब्यात घेतल्यानंतर नंदुरबार शहर पोलीस ठाण्याच्या स्वाधीन करण्यात आले. वैद्यकीय तपासणीनंतर गुरुवारी रात्री उशिरा त्यांना अटक करण्यात आली असून आज शुक्रवारी न्यायालयात हजर करण्यात येणार आहे.
पोलिसांनी दिलेल्या माहितीनुसार, समाजमाध्यमांवर व्हायरल झालेल्या कथित ऑडिओ क्लिपमध्ये भाजपच्या माजी खासदार डॉ. हिना गावित यांच्याबाबत आक्षेपार्ह आणि जातीवाचक वक्तव्य केल्याचा आरोप आहे. या प्रकरणी नंदुरबार शहर पोलीस ठाण्यात अनुसूचित जाती-जमाती (अत्याचार प्रतिबंधक) कायद्यासह विविध कलमांन्वये विजय चौधरी यांच्याविरुद्ध गुन्हा दाखल करण्यात आला होता. त्यानंतर सामाजिक कार्यकर्त्या मालती वळवी यांनीही स्वतंत्र तक्रार दाखल केली.
दरम्यान, या प्रकरणाला आणखी एक वेगळे वळण मिळाले. विजय चौधरी यांच्या मोबाईलमधील कथित ऑडिओ क्लिप चोरी करून त्या इतरांना विकल्या आणि समाजमाध्यमांवर प्रसारित केल्याचा आरोप करण्यात आला. या संदर्भात चौधरी यांच्या मुलाने दिलेल्या तक्रारीवरून त्यांच्या स्वीय सहाय्यकाविरुद्ध गुन्हा दाखल करण्यात आला होता. संबंधिताला अटकही करण्यात आली होती. चार दिवसांच्या पोलीस कोठडीनंतर त्याला न्यायालयाकडून जामीन मंजूर झाला.
नंदुरबारमध्ये गेल्या काही दिवसांपासून विविध कथित ऑडिओ क्लिप सातत्याने व्हायरल होत असून, त्यामधील संभाषणांमुळे अनेक व्यक्तींची बदनामी होत असल्याचा दावा केला जात आहे. या प्रकरणात विजय चौधरी यांच्या विरोधात आतापर्यंत तीन गुन्हे दाखल झाल्याची माहिती समोर आली आहे.
या कथित ऑडिओ क्लिपमध्ये मंत्री गिरीश महाजन, मंत्री जयकुमार रावल, आमदार आमश्या पाडवी, राजेश पाडवी, अमरीश पटेल यांच्यासह इतर काही राजकीय नेत्यांशी झालेल्या संभाषणांचा समावेश असल्याचा दावा करण्यात आला आहे. मात्र, संबंधित नेत्यांनी या कथित क्लिपमध्ये कृत्रिम बुद्धिमत्ता (AI) तंत्रज्ञानाचा वापर करून छेडछाड व फेरफार करण्यात आल्याचा आरोप केला आहे.
