ज्वारी-मका-बाजरी उत्पादकांनो लक्ष द्या! हमीभावाने खरेदीसाठी या तारखेपर्यत करा नोंदणी?
जळगाव, दि. १७ (जिमाका) : खरीप पणन हंगाम २०२६-२७ मधील किमान आधारभूत किंमत खरेदी योजनेअंतर्गत ज्वारी, मका व बाजरी भरडधान्य खरेदीसाठी दि. १ सप्टेंबर ते १५ ऑक्टोबर २०२६ या कालावधीत BeaM पोर्टलवर शेतकरी नोंदणी करण्यात येणार आहे.
शासनाने ज्वारी (संकरित) ४ हजार २३ रुपये, मका २ हजार ४१० रुपये व बाजरी २ हजार ९०० रुपये प्रति क्विंटल असे आधारभूत दर निश्चित केले आहेत.
जळगाव जिल्ह्यात अमळनेर, पारोळा, चोपडा, धरणगाव, पाळधी, एरंडोल, म्हसावद, जळगाव, भुसावळ, यावल, रावेर, मुक्ताईनगर, बोदवड, जामनेर, शेंदुर्णी, पाचोरा, भडगाव व चाळीसगाव येथे खरेदी केंद्रे निश्चित करण्यात आली आहेत.
शेतकऱ्यांनी नोंदणीसाठी आधारकार्ड, बँक पासबुक, चालू वर्षाचा ७/१२ उतारा व पीकपेरा या कागदपत्रांसह संबंधित खरेदी केंद्रावर प्रत्यक्ष उपस्थित राहणे आवश्यक आहे. तसेच Agristack वरील Farmer ID नोंदविणे बंधनकारक आहे. नोंदणी पूर्ण झाल्यानंतर System Generated Slip घेणे आवश्यक आहे.
जास्तीत जास्त शेतकऱ्यांनी किमान आधारभूत किंमत खरेदी योजनेचा लाभ घ्यावा, असे आवाहन पणन महासंघाचे अध्यक्ष रोहित निकम, संचालक मंत्री संजय सावकारे व संचालक संजय पवार यांनी केले आहे. अशी माहिती जिल्हा पणन अधिकारी एस. एस. मेने यांनी प्रसिद्धीपत्रकाद्वारे दिली आहे.
