जळगाव : प्रवाशांची वाढती मागणी आणि सणासुदीच्या काळातील संभाव्य गर्दी लक्षात घेऊन पश्चिम रेल्वेने अहमदाबाद–सांतरागाछी–अहमदाबाद विशेष रेल्वे गाडी चालविण्याचा निर्णय घेतला आहे. या विशेष गाडीला खान्देशातील दोन महत्त्वाच्या स्थानकांवर थांबा देण्यात आला आहे. त्यामुळे गुजरात, खान्देश आणि पूर्व भारतादरम्यान प्रवास करणाऱ्या प्रवाशांना अतिरिक्त रेल्वे सेवेचा पर्याय उपलब्ध होणार आहे.
अहमदाबादहून २२ सप्टेंबरला सुटणार
०२८३३ अहमदाबाद–सांतरागाछी विशेष गाडी २२ सप्टेंबर रोजी मंगळवारी दुपारी २ वाजून २५ मिनिटांनी अहमदाबाद स्थानकावरून रवाना होईल. ही गाडी विविध स्थानकांवर थांबे घेत तिसऱ्या दिवशी म्हणजे गुरुवारी पहाटे ३ वाजून ३० मिनिटांनी सांतरागाछी येथे पोहोचणार आहे. ०२८३४ सांतरागाछी–अहमदाबाद विशेष गाडी २० सप्टेंबर रोजी रविवारी पहाटे १२ वाजून १५ मिनिटांनी सांतरागाछी येथून रवाना होईल. दुसऱ्या दिवशी म्हणजे सोमवारी दुपारी १ वाजून ५० मिनिटांनी ही गाडी अहमदाबाद येथे पोहोचेल. दोन्ही दिशेच्या गाड्यांना प्रमुख स्थानकांवर नियोजित थांबे देण्यात आले आहेत.
नंदुरबार, भुसावळला महत्त्वाचा थांबा
अहमदाबाद–सांतरागाछी–अहमदाबाद विशेष गाडीला दोन्ही दिशेने आनंद, वडोदरा, भरुच, सुरत, नंदुरबार, भुसावळ, बडनेरा, नागपूर, गोंदिया, दुर्ग, रायपूर, बिलासपूर, झारसुगुडा, राऊरकेला, चक्रधरपूर, टाटानगर आणि खडगपूर या स्थानकांवर थांबा देण्यात आला आहे. नंदुरबार आणि भुसावळ येथे थांबा मिळाल्याने खान्देशातील प्रवाशांना या विशेष रेल्वेसेवेचा लाभ घेता येणार आहे. गुजरातकडे तसेच मध्य भारत आणि पश्चिम बंगालच्या दिशेने प्रवास करणाऱ्या प्रवाशांसाठी ही सेवा उपयुक्त ठरण्याची शक्यता आहे.
