मुक्ताईनगर | मुक्ताईनगर तालुक्यात थकीत पगाराच्या पैशांवरून झालेल्या वादाचे पर्यवसान एका मजुराच्या हत्येत झाल्याची धक्कादायक घटना समोर आली आहे. हॉटेल मालकाने काठीने डोक्यावर वार केल्याने गंभीर जखमी झालेल्या मजुराचा उपचारादरम्यान मृत्यू झाला. या प्रकरणी मृताच्या पत्नीच्या फिर्यादीवरून हॉटेल मालकाविरुद्ध भारतीय न्याय संहिता (BNS) कलम 103(1) अंतर्गत खुनाचा गुन्हा दाखल करण्यात आला आहे.
पोलिसांनी दिलेल्या माहितीनुसार, गोकुळ तारासिंग जाधव (रा. निंबापूर, ता. खकनार, जि. बुरहानपूर, मध्य प्रदेश) हे मुक्ताईनगर तालुक्यातील उचंदा शिवारातील एका हॉटेलमध्ये मजुरीचे काम करत होते. त्यांची पत्नी सुमित्राबाई गोकुळ जाधव (वय ५५) यांनी मुक्ताईनगर पोलिस ठाण्यात फिर्याद दाखल केली आहे.
फिर्यादीनुसार, १ ऑगस्ट रोजी मध्यरात्री सुमारे १ वाजण्याच्या सुमारास मुक्ताईनगर–बुरहानपूर महामार्गालगत उचंदा शिवारात ही घटना घडली. गोकुळ जाधव यांनी हॉटेल मालकाकडे अनेक दिवसांपासून थकीत असलेला पगार मागितला. यावरून दोघांमध्ये वाद झाला. वाद विकोपाला गेल्यानंतर कमलजीतसिंग प्रीतमसिंग (रा. शेर-ए-पंजाब हॉटेल, पूर्णाड फाटा, ता. मुक्ताईनगर) याने संतापाच्या भरात लाकडी काठीने गोकुळ जाधव यांच्या डोक्यावर जोरदार प्रहार केल्याचा आरोप फिर्यादीत करण्यात आला आहे.
या हल्ल्यात गोकुळ जाधव गंभीर जखमी झाले. त्यांना तातडीने उपचारासाठी रुग्णालयात दाखल करण्यात आले. मात्र उपचार सुरू असताना त्यांची प्राणज्योत मालवली.
या घटनेनंतर मृताच्या पत्नीने दिलेल्या तक्रारीवरून मुक्ताईनगर पोलिसांनी आरोपी कमलजीतसिंग प्रीतमसिंग याच्याविरुद्ध खुनाचा गुन्हा नोंदविला आहे. या प्रकरणाचा पुढील तपास उपविभागीय पोलीस अधिकारी आणि मुक्ताईनगर पोलीस करत आहेत.
