नाशिक : नाशिकमधील सप्तश्रृंगी गडावरुन दर्शन घेऊन परत येताना भाविकांवर काळाने घाला घातला. सप्तशृंगीगड येथील गणपती घाटात इनोव्हा कार १००० ते १२०० फुट खोल दरीत कोसळून भीषण अपघात होऊन यात ६ जणांचा मृत्यू झाला. अपघाताची माहिती मिळताच स्थानिक नागरिकांनी आणि आपत्ती व्यवस्थापन पथकाने घटनास्थळी धाव घेतली अन् बचावकार्य केले. मुख्यमंत्री देवेंद्र फडणवीस आणि पंतप्रधान नरेंद्र मोदी यांनी याबाबत दुख व्यक्त केले.
MH 15 BN 0555 या कारमधून भाविक सप्तशृंगी गडावर श्री सप्तशृंगी मातेचे दर्शन घेण्यासाठी गेले होते. दर्शन घेऊन घराकडे परत येत असताना काळाने घाला घातला. ओव्हरटेक करत असताना चालकाचे नियंत्रण सुटले अन् कार कठडे तोडून थेट ३०० फूट खोल दरीत कोसळली. घाटातील गणपती पॉइंटजवळ ही घटना घडली.
या अपघातातील सर्वजण हे पिंपळगाव बसवंत येथील रहिवासी होते. किर्ती पटेल (वय 50), रशिला पटेल (वय 50), विठ्ठल पटेल (वय 65), लता पटेल (वय 60), पचन पटेल (वय 60), मनी बेन पटेल (वय 70) यांचा या अपघातात मृत्यू झाला आहे. एकाच कुटुंबातील सहा जणांचा दुर्दैवी मृत्यू झाल्याने दु:ख व्यक्त केलं जात आहे. या भाविकांच्या वारसांना 5 लाख रुपयांचे आर्थिक सहाय्य राज्य सरकारच्या वतीने देण्यात येईल, असे मुख्यमंत्री देवेंद्र फडणवीस यांनी सांगितले.
