जळगाव : जिल्ह्यातील जामनेर तालुक्यात शेंदुर्णी ते पहूर मार्गावर शालेय पोषण आहाराची वाहतूक करणारा टेम्पो मंगळवारी दुपारी अचानक टायर फुटल्याने उलटला. या दुर्घटनेत टेम्पोमध्ये पोषण आहाराच्या गोण्यांवर बसलेले दोन हमाल वाहनाबाहेर फेकले गेल्यानंतर गंभीर जखमी झाल्याने दोघांचाही जागीच मृत्यू झाला.
शेंदुर्णी ते पहूर रस्त्यावरुन धावणाऱ्या ४०७ टेम्पोमध्ये पाचोरा येथून शालेय पोषण आहाराच्या गोण्या भरण्यात आल्या होत्या. हा माल पुढील वितरणासाठी नेला जात असताना अपघात घडला. वाहतुकीदरम्यान दोन हमाल टेम्पोमधील पोषण आहाराच्या गोण्यांवर बसले होते, अशी माहिती समोर आली आहे. टेम्पो रस्त्याने धावत असताना अचानक टायर फुटला. त्यामुळे चालकाचे वाहनावरील नियंत्रण सुटले आणि टेम्पो रस्त्यावर उलटला. अपघाताची तीव्रता एवढी होती की, गोण्यांवर बसलेले दोन्ही हमाल वाहनाबाहेर फेकले गेले. त्यांना गंभीर दुखापत झाली आणि घटनास्थळीच त्यांचा मृत्यू झाला.
अपघातात मृत्यू झालेल्या दोन्ही हमालांची नावे जगदीश लालचंद पाटील (रा. कृष्णापुरी, पाचोरा) आणि अर्जुन तुकाराम पाटील (रा. बहिरम नगर, पाचोरा) अशी आहेत. या दुर्घटनेनंतर शालेय पोषण आहाराच्या वाहतुकीच्या पद्धतीवर गंभीर प्रश्न उपस्थित झाले आहेत. मालवाहू वाहनातून पोषण आहाराच्या गोण्यांची वाहतूक करताना त्याच वाहनात कामगारांना गोण्यांवर बसवून नेण्यात येत असल्यास, ही पद्धत नियमांनुसार कितपत योग्य आहे, असा सवाल उपस्थित केला जात आहे.
वाहनाची मालवाहू क्षमता, फिटनेस प्रमाणपत्र, परमिट, विमा तसेच वाहतुकीसंदर्भातील इतर कागदपत्रे वैध होती का, याचीही तपासणी होणे आवश्यक आहे. अपघात केवळ टायर फुटल्यामुळे झाला, असे मानून प्रकरण संपवण्याऐवजी वाहतुकीतील सुरक्षेच्या सर्व बाबींची चौकशी करण्याची मागणी होत आहे. पाचोरा येथून निघालेला पोषण आहार नेमका कोणत्या केंद्रासाठी नेण्यात येत होता? या वाहतुकीचे कंत्राट कोणत्या संस्था किंवा कंत्राटदाराकडे होते? कामगारांच्या सुरक्षेसाठी आवश्यक उपाययोजना करण्यात आल्या होत्या का? वाहनामध्ये कामगारांना बसवण्यास परवानगी होती का? यांसह अनेक प्रश्न आता उपस्थित झाले आहेत. शासकीय योजनेशी संबंधित वाहतुकीत अशा प्रकारची घटना घडल्याने संबंधित विभागानेही या प्रकरणाची स्वतंत्रपणे चौकशी करून दोषी आढळणाऱ्यांवर कठोर कारवाई करावी, अशी मागणी नागरिकांकडून केली जात आहे.
पहूर पोलिसांकडून पंचनामा; तपास सुरू
अपघाताची माहिती मिळताच पहूर पोलिसांनी घटनास्थळी धाव घेतली. पोलिसांनी घटनास्थळाचा पंचनामा करून अपघाताची कारणे आणि परिस्थितीची माहिती घेण्यास सुरुवात केली आहे. वाहनाची तांत्रिक स्थिती, टायरची अवस्था, चालकाचे नियंत्रण का सुटले, तसेच वाहनात कामगारांना कोणत्या परिस्थितीत बसवण्यात आले होते, यासह विविध बाबींचा तपास केला जात आहे. या अपघातात दोन कष्टकरी हमालांचा जीव गेल्याने केवळ अपघाताचे कारण शोधणे पुरेसे ठरणार नाही, तर वाहतुकीच्या संपूर्ण प्रक्रियेत कोणाचा निष्काळजीपणा झाला का, याची जबाबदारी निश्चित होणे गरजेचे आहे. संबंधित कंत्राटदार, वाहनमालक किंवा इतर कोणाची नियमभंगात भूमिका आढळल्यास त्यांच्यावर कठोर कारवाई करावी, अशी मागणी जोर धरत आहे.
