उत्तर महाराष्ट्रातील रेल्वे प्रवाशांना धक्का! एलटीटी–बरेली साप्ताहिक एक्स्प्रेसच्या फेऱ्या तात्पुरत्या रद्द
उत्तर महाराष्ट्रातून उत्तर प्रदेशकडे प्रवास करणाऱ्या रेल्वे प्रवाशांसाठी महत्त्वाची बातमी आहे. लोकमान्य टिळक टर्मिनस (एलटीटी)–बरेली साप्ताहिक एक्स्प्रेस काही दिवसांसाठी रद्द करण्यात आली आहे. बरेली यार्डात देखभाल आणि दुरुस्तीची कामे हाती घेण्यात येणार असल्याने रेल्वे प्रशासनाने दोन्ही दिशांतील गाड्यांच्या फेऱ्या तात्पुरत्या रद्द करण्याचा निर्णय घेतला आहे.
रेल्वे प्रशासनाच्या माहितीनुसार, गाडी क्रमांक १४३१३ एलटीटी–बरेली साप्ताहिक एक्स्प्रेस २० जुलै ते ३ ऑगस्ट २०२६ या कालावधीत लोकमान्य टिळक टर्मिनस येथून सुटणाऱ्या सर्व फेऱ्यांसाठी रद्द राहणार आहे. तसेच गाडी क्रमांक १४३१४ बरेली–एलटीटी साप्ताहिक एक्स्प्रेस १८ जुलै ते १ ऑगस्ट २०२६ या कालावधीत बरेलीहून सुटणाऱ्या सर्व नियोजित फेऱ्यांसाठी रद्द करण्यात आली आहे.
रेल्वे प्रशासनाने दिलेल्या माहितीनुसार, उत्तर रेल्वेच्या मुरादाबाद विभागातील बरेली यार्डातील वॉशिंग लाईनवर मोठ्या प्रमाणात देखभाल आणि दुरुस्तीची कामे करण्यात येणार आहेत. या ठिकाणी रेल्वे रेकची स्वच्छता, तांत्रिक तपासणी आणि पुढील प्रवासासाठी आवश्यक देखभाल केली जाते. या कामांमुळे रेकची उपलब्धता कमी होणार असल्याने सुरक्षित रेल्वे वाहतुकीसाठी संबंधित गाड्या तात्पुरत्या रद्द करण्याचा निर्णय घेण्यात आला आहे.
एलटीटी–बरेली एक्स्प्रेसला कल्याण, नाशिक रोड, मनमाड, जळगाव आणि भुसावळ या उत्तर महाराष्ट्रातील महत्त्वाच्या स्थानकांवर थांबा आहे. त्यामुळे जळगाव, भुसावळ आणि परिसरातील शेकडो प्रवासी या गाडीचा नियमित वापर करतात. गाडी रद्द झाल्याने उत्तर प्रदेश, मुंबई आणि उत्तर महाराष्ट्रादरम्यान प्रवास करणाऱ्या प्रवाशांना पर्यायी रेल्वे सेवांचा आधार घ्यावा लागणार आहे.
विशेषतः नोकरी, शिक्षण, व्यवसाय, वैद्यकीय उपचार तसेच कौटुंबिक कारणांसाठी प्रवास करणाऱ्या प्रवाशांनी आपले आरक्षण आणि प्रवासाचे नियोजन वेळेत बदलण्याचे आवाहन रेल्वे प्रशासनाने केले आहे.
