पाचोरा / प्रतिनिधी:
परधाडे ते पाचोरा रेल्वे स्थानकादरम्यान धावत्या रेल्वेतून पाय घसरून खाली पडल्याने एका ३६ वर्षीय तरुणाचा जागीच मृत्यू झाल्याची दुर्दैवी घटना घडली आहे. संजय अनिल पाटील (वय ३६, रा. दुसखेडा, ता. पाचोरा) असे मृत तरुणाचे नाव असून, या अपघातानंतर परिसरामध्ये व त्याच्या कुटुंबात शोककळा पसरली आहे.
अशी घडली दुर्दैवी घटना
मिळालेल्या माहितीनुसार, मृत संजय पाटील हे अहमदाबाद येथील एका खाजगी कंपनीत वेल्डिंगचे काम करून आपल्या कुटुंबाचा उदरनिर्वाह करत होते. कुटुंबाच्या उदरनिर्वाहासाठी परराज्यात मेहनतमजुरी करणारे संजय ४ ऑक्टोबर रोजी सायंकाळी अहमदाबादहून आपल्या गावी येण्यासाठी निघाले होते.
सोमवारी पहाटे ते जळगाव रेल्वे स्थानकावर पोहोचले. तेथून पाचोऱ्याला जाण्यासाठी त्यांनी पुन्हा रेल्वेने प्रवास सुरू केला. मात्र, परधाडे ते पाचोरा रेल्वे स्थानकादरम्यान रेल्वे पोल क्रमांक ३८१/२६ जवळ अचानक त्यांचा पाय घसरला आणि तोल गेल्याने ते धावत्या रेल्वेतून खाली रानावनात किंवा ट्रॅकवर कोसळले. या भीषण अपघातात त्यांचा जागीच मृत्यू झाला. सोमवार (दि. ५) सकाळी १० वाजेच्या सुमारास ही दुर्घटनेची माहिती समोर आली.
प्रशासन आणि सामाजिक कार्यकर्त्यांची मदत
घटनेची माहिती मिळताच पाचोरा पोलीस ठाण्याचे पोलीस कॉन्स्टेबल कमलेश पाटील यांनी ‘जय महाकाल’ रुग्णवाहिकेचे चालक किशोर लोहार यांच्यासह तातडीने घटनास्थळी धाव घेतली. तेथे पंचनामा केल्यानंतर चालक किशोर लोहार व मयूर सोनार यांच्या मदतीने मृतदेह पाचोरा ग्रामीण रुग्णालयात शवविच्छेदनासाठी हलवण्यात आला.
या अचानक घडलेल्या आघातामुळे मृत संजय यांच्या पश्चात वृद्ध आई-वडील, पत्नी व एक भाऊ असा भरतांडा परिवार पोरका झाला आहे. याप्रकरणी पाचोरा पोलीस ठाण्यात अकस्मात मृत्यूची नोंद करण्यात आली असून, पुढील तपास पोलीस नाईक हरीश गवळी करीत आहेत.
