रावेर । राज्यात पूर्णपणे प्रतिबंधित असलेल्या गुटखा आणि पानमसाल्याची अवैध तस्करी एका अपघातामुळे चव्हाट्यावर आली आहे. रावेर तालुक्यातील निंभोरा पोलीस ठाण्याच्या हद्दीत झालेल्या साध्या अपघाताचा छडा लावताना पोलिसांनी हुंडाई कारमधून केली जाणारी गुटख्याची मोठी अवैध वाहतूक उघडकीस आणली आहे. या धडक कारवाईत पोलिसांनी तब्बल ७ लाख ७० हजार ४४० रुपयांचा मुद्देमाल जप्त करत छत्रपती संभाजीनगरमधील दोघा तस्करांना बेड्या ठोकल्या आहेत.
नेमकी घटना अशी
७ ऑक्टोबर २०२६ रोजी पहाटे ५:४५ च्या सुमारास निंभोरा हद्दीतील वडगाव फाट्याशी (ता. रावेर) एक चारचाकी कार (क्रमांक MH-२६-V-४४२३) एका ट्रॅक्टरला मागून धडकल्याची माहिती पोलिसांना मिळाली. या माहितीनुसार सहा. पोलीस निरीक्षक मीरा देशमुख, उपनिरीक्षक अभय ढाकणे व त्यांचे पथक तातडीने घटनास्थळी पोहोचले. अपघातग्रस्त गाडीमुळे वाहतूक विस्कळीत झाल्याने सुरक्षेचा उपाय म्हणून पोलिसांनी ती कार, चालक व सोबतच्या इसमाला तातडीने पोलीस ठाण्यात आणले.
पोलिसांनी जेव्हा त्या वाहनाची कसून झडती घेतली, तेव्हा आतील दृश्य पाहून त्यांना संशय आला. पंचांसमक्ष केलेल्या तपासणीत त्या कारमध्ये महाराष्ट्र शासनाने बंदी घातलेला विविध कंपन्यांचा प्रतिबंधित गुटखा, पानमसाला आणि सुगंधित तंबाखूचा मोठा साठा आढळून आला.
गुन्हा दाखल आणि जप्त मुद्याचा तपशील
या प्रकरणी निंभोरा पोलीस ठाण्यात भारतीय न्याय संहिता (BNS) आणि अन्न सुरक्षा कायद्याच्या विविध कलमांनुसार गुन्हा दाखल करण्यात आला आहे. कारवाईत पोलिसांनी ५ लाख ९० हजार ४४० रुपयांचा प्रतिबंधित गुटखा आणि १ लाख ८० हजार रुपयांची कार असा एकूण ७ लाख ७० हजार ४४० रुपयांचा ऐवज जप्त केला आहे.
मुख्य सूत्रधाराचा कसून शोध सुरू
या प्रकरणी पोलिसांनी अजीम तैय्यब सय्यद आणि शेख मुद्दस्सिर कासिम (दोघेही रा. छत्रपती संभाजीनगर) यांना अटक केली आहे. हा अवैध माल नेमका कुठून आणला जात होता आणि या रॅकेटचा मुख्य सूत्रधार कोण आहे, याबाबत पोलीस आता सखोल चौकशी करत आहेत.
ही उल्लेखनीय कामगिरी पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी अनिल बडगुजर यांच्या मार्गदर्शनाखाली निंभोरा पोलीस स्टेशनच्या सहा. पोलीस निरीक्षक मीरा देशमुख, पोउपनि अभय ढाकणे व त्यांच्या पथकातील अंमलदारांनी पार पाडली आहे.
