भुसावळ । भुसावलमधील दिपनगर औष्णिक विद्युत केंद्राच्या रेल्वे ओव्हर ब्रिजजवळ ट्रॅकवरून कोळसा चोरी करणाऱ्या ८ जणांच्या टोळीला भुसावळ तालुका पोलिसांनी जेरबंद केले आहे. याप्रकरणी भुसावळ तालुका पोलिस ठाण्यात गुन्हा दाखल करण्यात आला असून, पोलिसांनी आरोपींकडून चोरीचा कोळसा आणि गुन्ह्यात वापरलेले ट्रॅक्टर असा एकूण २ लाख २० हजार रुपयांचा मुद्देमाल जप्त केला आहे.
काय आहे प्रकरण?
१ सप्टेंबर २०२६ रोजी सकाळी ७ वाजण्याच्या सुमारास, दिपनगर औष्णिक विद्युत केंद्रातील रेल्वे ओव्हर ब्रिजजवळ काही इसम रेल्वे ट्रॅकवरील कोळसा चोरून ट्रॅक्टरमध्ये भरत असल्याची माहिती सुरक्षा अधिकारी सोमेश्वर मधुकर जाधव यांना मिळाली. माहिती मिळताच त्यांनी तात्काळ घटनास्थळी धाव घेतली. तिथे ७ ते ८ इसम कोळसा चोरी करताना आढळले.
सुरक्षा अधिकाऱ्यांनी त्यांना हटकले आणि त्यांची नावे विचारली असता, त्यांनी आपली नावे शेखर चंद्रकांत बावस्कर, धिरज संजय सोनवणे, मुकेश अरुण सोनवणे, जितेंद्र संजय शिंदे, मोहित किरण पाटील, विजय जगदीश पावरी (सर्व रा. फुलगाव, ता. भुसावळ) व इतर दोन अनोळखी असल्याचे सांगितले. यावेळी त्या दोन अनोळखी चोरांनी सुरक्षा अधिकाऱ्यांशी हुज्जत घालून शासकीय कामात अडथळा निर्माण केला आणि कोळशाने भरलेले ट्रॅक्टर घेऊन पोबारा केला.
तपासात उघड झाले दोन आरोपी:
याप्रकरणी भुसावळ तालुका पोलिस ठाण्यात भारतीय न्याय संहितेच्या (BNS) विविध कलमान्वये गुन्हा नोंदवण्यात आला असून, या गुन्ह्याचा तपास पोलिस नाईक हेमंत मिटकरी यांनी केला. तपासादरम्यान पोलिसांनी कसून चौकशी करत उर्वरित दोन अनोळखी चोरांची नावे निष्पन्न केली. रोहीत किरण सोनवणे आणि सागर रविंद्र कोळी (दोन्ही रा. फुलगाव) अशी त्यांची नावे समोर आली.
पोलिसांची धडक कारवाई आणि मुद्देमाल जप्त:
या गुन्ह्यात पोलिसांनी एकूण ८ आरोपींना अटक केली. न्यायालयातून २ सप्टेंबर ते ४ सप्टेंबरपर्यंत त्यांची पोलीस कोठडी रिमांड घेण्यात आली. तपासादरम्यान पोलिसांनी गुन्ह्यात वापरलेले २,००,००० रुपये किमतीचे ट्रॅक्टर (क्रमांक एमएच १९ सीझेड ३८७३) आणि ट्रॉली (क्रमांक एमएच १९ एएन ६५८४) तसेच ५ टन कोळसा (किंमत २०,००० रुपये) असा एकूण २,२०,००० रुपये किमतीचा मुद्देमाल जप्त केला आहे.
सदर धडक कारवाई पोलिस अधीक्षक श्रीकांत धिवरे, अपर पोलिस अधीक्षक संदीप गावीत आणि उपविभागीय पोलिस अधिकारी केदार बारबोले यांच्या मार्गदर्शनाखाली, भुसावळ तालुका पोलिस ठाण्याचे प्रभारी अधिकारी तथा परिविक्षाधीन पोलिस उपअधीक्षक प्रशांत दरेकर आणि त्यांच्या पथकातील अधिकाऱ्यांनी व अंमलदारांनी यशस्वीरीत्या पार पाडली.
