पाचोरा । पाचोरा तालुक्यातील नगरदेवळा येथील रहिवासी आणि मुंबईत कार्यरत असलेले पोलीस उपनिरीक्षक देवेंद्र उमेशसिंग राऊळ यांच्या घरावर अज्ञात व्यक्तींनी पेट्रोल टाकून जाळपोळीचा प्रयत्न केल्याची घटना समोर आलीय. सुदैवाने घरातील महिलांनी प्रसंगावधान दाखवत आग आटोक्यात आणल्याने मोठी दुर्घटना टळली. या घटनेने संपूर्ण जिल्ह्यात खळबळ उडाली
मिळालेल्या माहितीनुसार राऊळ गल्ली परिसरात असलेल्या पीएसआय देवेंद्र राऊळ यांच्या राहत्या घरी त्यांची आई नंदकोर राऊळ आणि बहीण किरण राऊळ झोपलेल्या होत्या. मध्यरात्री २:३० च्या सुमारास अचानक घराबाहेर काही हालचाल झाली आणि पेट्रोलचा वास सुटला. इतक्यात अज्ञातांनी दरवाजाला आग लावली. धुराच्या वासामुळे आई नंदकोर यांना जाग आली असता, त्यांना घराच्या दरवाजाचा पडदा जळताना दिसला. सुरुवातीला शॉर्ट सर्किट वाटले, पण दरवाजा उघडल्यावर बाहेर पेट्रोलची बाटली आणि आगपेटी पाहून त्यांच्या पायाखालची जमीन सरकली.
त्यामुळे हा प्रकार अपघाती नसून जाणीवपूर्वक जाळपोळीचा प्रयत्न असल्याचे स्पष्ट झाले. यानंतर परिसरातील किराणा दुकानाच्या सीसीटीव्ही फुटेजमध्ये दोन अज्ञात इसम विना क्रमांकाच्या मोटारसायकलवर संशयास्पद रित्या फिरताना दिसत आहेत. गणपती मंदिराजवळ गाडी लावून ते गल्लीच्या दिशेने जाताना फुटेजमध्ये कैद झाले आहेत. विशेष म्हणजे, या नराधमांनी पूर्ण नियोजित कट रचूनच हा हल्ला केल्याचे दिसत आहे.
या प्रकरणी किरण राऊळ यांच्या फिर्यादीवरून पाचोरा पोलीस ठाण्यात गुन्हा दाखल करण्यात आला आहे. भरवस्तीत एका पोलीस अधिकाऱ्याच्या घराला आग लावण्याचा प्रयत्न होतोच कसा? असा संतप्त सवाल नागरिक विचारत आहेत. आता पाचोरा पोलीस त्या सीसीटीव्हीतील आरोपींच्या मुसक्या कधी आवळतात, याकडे सर्वांचे लक्ष लागले आहे.
