स्मशानभूमीतून महिलेच्या अस्थींसोबत दागिन्यांचीही चोरी ; शिरसोली (प्र.न.) येथील घटना

जळगाव । एकीकडे जळगाव जिल्ह्यात चोरट्यांनी धुमाकूळ घातला असताना अशातच एक डोकं चक्रावून टाकणारी घटना समोर आली आहे. जळगाव तालुक्यातील शिरसोली (प्र.न.) येथील स्मशानभूमीतून सोन्याच्या लालसेपोटी एका वृद्ध महिलेच्या अस्थींची चोरी केल्याचा धक्कादायक प्रकार आज गुरुवारी सकाळी उघडकीस आला

सुमनबाई चावदस पाटील यांचे मंगळवारी दुपारी निधन झाले होते. त्यामुळे दुसऱ्या दिवशी बुधवारी सकाळी त्यांच्यावर शिरसोली गावातील स्मशानभूमीत अंत्यसंस्कार करण्यात आले. तिसऱ्या दिवशी गुरूवारी प्रथेनुसार अस्थी गोळा करण्यासाठी पाटील कुटुंबिय सकाळी आठ वाजता स्मशानभूमीत गेले.

मात्र, त्या ठिकाणी मृत सुमनबाई पाटील यांच्या डोक्याखालील भागाची राख आणि अस्थी अज्ञात चोरट्यांनी चोरून नेल्याचे दिसून आले. धक्कादायक बाब म्हणजे सुमनबाई पाटील यांच्या अंगावरील सुमारे दीड ग्रॅमचे दागिने देखील अज्ञात चोरट्याने लंपास केले होते. या घटनेनंतर पाटील कुटुंबियांसह ग्रामस्थांनी संताप व्यक्त करून अज्ञात चोरट्याला पकडून त्याच्यावर कारवाई करावी, अशी मागणी केली.