जळगावात एकाच दिवसात दोन अपघात; ट्रॅक्टरच्या धडकेत ममुराबादचा तरुण ठार
जळगाव । जळगाव शहरात आज दोन अपघाताच्या घटना घडल्या. एकीकडे शहरातील शिव कॉलनीजवळील रेल्वे उड्डाणपुलावर आज अज्ञात अवजड वाहनाने दुचाकीस्वार वृद्धाला चिरडल्याची दुर्दैवी घटना घडली असताना दुसरीकडे ममुराबाद रस्त्यावरील मितवा हॉटेलजवळ ट्रॅक्टरच्या धडकेत दुचाकीस्वार विलास रामसिंग भिल, (वय 40, ममुराबाद) हा तरुण जागीच ठार झाल्याची घटना घडली. यामुळे शहरात खळबळ उडाली आहे.
विलास रामसिंग भिल हा ममुराबाद येथील राहणारा होता. तो ऊस तोडण्याचे काम करून आपला उदरनिर्वाह करत होता. आज गुरुवारी दुपारी 1 वाजेच्या सुमारास तो दुचाकी (एमएच 10 एआय 0381) ने जळगाव शहरातून ममुराबाद येथे घरी येत असताना, ममुराबाद रस्त्यावरील हॉटेल मितवा जवळून जात असतांना समोरून येणार्‍या सिमेंटने भरलेल्या ट्रॅक्टरने (एमएच 19 पीआय 3375) जोरदार धडक दिली. या धडकेत विलास भिल जागीच ठार झाला.
ही घटना घडल्यानंतर जळगाव तालुका पोलीसांनी घटनास्थळी धाव घेतली आणि मृतदेहाचा पंचानामा करून जिल्हा शासकीय वैद्यकीय महाविद्यालयात रवाना केला. याबाबत ट्रॅक्टरवरील अज्ञात चालकावर गुन्हा दाखल करण्याचे काम सुरू होते. विलासच्या पश्चात त्याची पत्नी, चार मुली आणि एक मुलगा असा परिवार आहे.
