जळगाव । विधानसभा निवडणुकीत भाजप व शिंदे सेनेने विश्वासात घेतले नाही तर त्या पक्षाच्या उमेदवारांचा प्रचार करणार नाही, असा इशारा राष्ट्रवादी काँग्रेस पक्षाच्या अजित पवार गटाने दिला आहे. भाजपच्या उमेदवारांची पहिली यादी जाहीर झाली आहे. शिंदे सेनेचे उमेदवार अजून जाहिर झालेले नाहीत, तत्पूर्वीच जिल्ह्यात महायुतीत वादाची ठिणगी पडली आहे.
विधानसभा निवडणुकीच्या पार्श्वभूमीवर अजित पवार गटाची जिल्हाध्यक्ष संजय पवार यांच्या अध्यक्षतेखाली जिल्हा बैठक झाली. जळगाव लोकसभा क्षेत्रातील सर्व तालुकाध्यक्ष, विधानसभाक्षेत्र प्रमुख, तसेच जिल्हा कार्यकारिणी पदाधिकारी, महिला, युवक, युवती, विद्यार्थ्यांसह सर्वच सेलचे जिल्हाध्यक्ष या बैठकीला उपस्थित होते. सर्वच तालुकाअध्यक्षांनी बैठकीत महायुतीच्या शिंदे गट व भाजपच्या उमेदवारांनी आम्हाला विश्वासात घेतल्याशिवाय आम्ही प्रचार करणार नसल्याची भूमिका मांडली.
बैठकीला माजी आमदार मनीष जैन, महानगराध्यक्ष अभिषेक पाटील, कार्याध्यक्ष योगेश देसले, महिला अध्यक्षा कल्पना पाटील, मीनल पाटील, नदीम मलिक, भूषण भदाणे, रवींद्र नाना पाटील, अरविंद मानकरी, ज्ञानेश्वर महाजन, ईश्वर पाटील, मोनिका पवार, अभिलाषा रोकडे, निशांत चौधरी, फैजान पटेल यांच्यासह जिल्हा कार्यकारिणी पदाधिकारी उपस्थित होते.
काही तालुकाध्यक्षांनी बैठकीत त्यांच्या भावना व्यक्त केल्या आहेत. यासंदर्भात आपण महायुतीच्या सर्व उमेदवारांशी बोलणार आहोत. त्या- त्या तालुक्याच्या अध्यक्षांना योग्य तो सन्मान देण्यात यावा, अशी आमची भूमिका आहे.
-संजय पवार, जिल्हाध्यक्ष, राष्ट्रवादी अजित पवार गट.
