मंत्रिमंडळ बैठकीत दुष्काळाबाबत सर्वात मोठा निर्णय! वगळलेल्या तालुक्यांचाही दुष्काळग्रस्त यादीत समावेश होणार!

मुंबई । राज्य मंत्रिमंडळाची आज महत्त्वाची बैठक पार पडली. मुख्यमंत्री देवेंद्र फडणवीस यांच्या अध्यक्षस्थानी झालेल्या या बैठकीत दुष्काळ निवारण तसेच शेतकरी मदत यासारख्या महत्त्वाच्या मुद्द्यांवर चर्चा करण्यात आली.सरकारने दुष्काळ जाहीर केल्यानंतर काही तालुके दुष्काळग्रस्त तालुक्यांच्या यादीतून वगळले होते. याच वगळलेल्या तालुक्यांबाबत आता महत्त्वाचा निर्णय घेण्यात आालाय.

दरम्यान, राज्यातील दुष्काळाच्या परिस्थितीचा आढावा घेताना काही तालुके आणि भाग दुष्काळाच्या मदतीपासून वगळले गेले होते. अशा भागांना आता दिलासा देण्याचा निर्णय राज्य मंत्रिमंडळाच्या बैठकीत घेण्यात आल्याची माहिती आहे.

दुष्काळामुळे शेती, पिकांचे नुकसान आणि ग्रामीण भागातील नागरिकांवर आर्थिक परिणाम झाला आहे. त्यामुळे मदतीपासून वंचित राहिलेल्या भागांचा पुन्हा विचार करून त्यांना आवश्यक सवलती आणि मदत देण्याचा सरकारचा प्रयत्न आहे.

या निर्णयामुळे वगळण्यात आलेल्या तालुक्यांतील शेतकरी आणि नागरिकांना काही प्रमाणात आर्थिक दिलासा मिळण्याची अपेक्षा आहे. सरकारकडून संबंधित भागांबाबत पुढील कार्यवाही आणि मदतीचे स्वरूप स्पष्ट केले जाण्याची शक्यता आहे.

अग्निवीरांना सरकारी नोकरीत 10 टक्के आरक्षण
अग्निवीर म्हणून देशसेवा केलेल्या जवानांना महाराष्ट्रातील सरकारी नोकऱ्यांमध्ये 10 टक्के समांतर आरक्षण देण्यात येणार आहे. या निर्णयामुळे अग्निवीरांना चार वर्षांची सेवा पूर्ण केल्यानंतर पुढील करिअरसाठी मोठा आधार मिळणार आहे.

समांतर आरक्षणाचा अर्थ संबंधित प्रवर्गातील उपलब्ध जागांमध्ये या उमेदवारांसाठी स्वतंत्र संधी उपलब्ध करून देणे असा आहे. त्यामुळे अग्निवीरांना सरकारी भरतीमध्ये सहभागी होताना या निर्णयाचा फायदा होण्याची शक्यता आहे.

परीक्षा शुल्क घेऊन रिफंड करण्यापेक्षा आधीच घेऊ नका
डीपीडीसीमध्ये अधिकाधिक कामे ही दुष्काळ निवारणाची घ्या. पालकमंत्र्यांनी कल्पकतेने स्थानिक स्तरावर काय निर्णय घेता येईल, यावर लक्ष द्यावे, अशा सूचना फडणवीस यांनी पालकमंत्र्यांना केल्या आहेत. तसेच विद्यार्थ्यांचे इयत्ता दहावी-बारावीचे परीक्षा शुल्क घेऊन रिफंड करण्यापेक्षा आधीच घेऊ नका, असा महत्त्वाचा आदेश फडणवीस यांनी दिलाय. फडणवीस यांच्या या आदेशामुळे आता विद्यार्थ्यांनाही दिलासा मिळणार आहे.

पाणीवापरासाठी स्पष्ट जिआर काढा
दुष्काळाच्या या काळात पाणीटंचाईचा मोठा प्रश्न उभा राहू शकतो. पाण्याचे नियोजन करणे गरजेचे आहे. म्हणूनच पाणीवापर कसा करायचा याचा स्वयंस्पष्ट GR काढा, पिण्याचे पाणी गृहीत धरताना त्यात जनावरांचे पाणी समाविष्ट करा आणि नंतर इतर प्राधान्यक्रम ठरवा, असाही आदेश फडणवीस यांनी दिला.