यावल कृषी कार्यालयावर पुन्हा दुःखाचा डोंगर! अधिकाऱ्यानंतर अवघ्या आठवडाभरात कर्मचाऱ्याचाही हृदयविकाराने मृत्यू!

यावल । यावल तालुका कृषी कार्यालयातील अधिकारी-कर्मचाऱ्यांवर सलग दुसऱ्यांदा दुःखाचा प्रसंग ओढवला आहे. काही दिवसांपूर्वी तालुका कृषी अधिकारी भरत वारे यांच्या निधनानंतर आता याच कार्यालयातील कर्मचाऱ्याचा हृदयविकाराच्या झटक्याने निधन झाले आहे. हैदर हबीब तडवी (वय ५२) असं निधन झालेल्या कर्मचाऱ्याचे नाव असून एका आठवड्यात दोघांचा मृत्यू झाल्याने कृषी विभागात शोककळा पसरली आहे.

हैदर हबीब तडवी हे यावल तालुका कृषी कार्यालयात शासकीय सेवेत कार्यरत होते. मूळचे रावेर तालुक्यातील कळमोदा येथील असलेले तडवी सध्या यावल शहरातील तडवी कॉलनीत कुटुंबासह राहत होते.बुधवारी (९ सप्टेंबर) त्यांनी नेहमीप्रमाणे कार्यालयात हजेरी लावून दिवसभराचे कामकाज केले. सायंकाळी ५ वाजता कार्यालयीन कामकाज आटोपल्यानंतर ते आपल्या घरी परतले. मात्र, घरी गेल्यानंतर काही वेळातच त्यांची प्रकृती अचानक खालावली.

सायंकाळी सातच्या सुमारास त्यांना अचानक त्रास जाणवू लागल्याने कुटुंबीयांनी तातडीने त्यांना यावल ग्रामीण रुग्णालयात दाखल केले. डॉक्टरांनी तपासणी केली असता त्यांचा मृत्यू झाल्याचे स्पष्ट झाले. वैद्यकीय अधिकारी डॉ. तुषार सोनवणे यांनी तपासणी केली.

कुटुंबीयांवर दुःखाचा डोंगर

हैदर तडवी यांच्या आकस्मिक निधनाची माहिती मिळताच तडवी कॉलनी परिसरात शोककळा पसरली. अचानक घडलेल्या या घटनेमुळे त्यांच्या कुटुंबीयांसह नातेवाईक, मित्रपरिवार आणि कृषी विभागातील सहकाऱ्यांना मोठा धक्का बसला आहे.तडवी यांच्या पश्चात आई, पत्नी, एक मुलगा, एक मुलगी, सून, जावई आणि नातवंडे असा परिवार आहे. कुटुंबातील कर्त्या व्यक्तीचे अचानक निधन झाल्याने नातेवाईकांकडून दुःख व्यक्त केले जात आहे.

अवघ्या काही दिवसांपूर्वी याच कार्यालयातील तालुका कृषी अधिकारी भरत वारे यांचे हृदयविकाराच्या तीव्र झटक्याने निधन झाले होते. वारे यांच्या निधनाच्या दुःखातून अधिकारी-कर्मचारी सावरत असतानाच हैदर तडवी यांच्या आकस्मिक निधनाची घटना घडल्याने कार्यालयातील वातावरण अधिकच दुःखमय झाले आहे. एकाच आठवड्यात शासकीय सेवेत कार्यरत असलेल्या दोन व्यक्तींचे अचानक निधन झाल्याने यावल तालुका कृषी कार्यालयासह संपूर्ण तालुक्यात हळहळ व्यक्त होत आहे.