जळगाव । जळगाव जिल्ह्यात लाचखोरीचे प्रकार काही केल्या कमी होताना दिसत नसून अशातच पाचोरा शहरात स्टॅम्प खरेदीसाठी गेलेल्या नागरिकाकडून नियमबाह्य अतिरिक्त रक्कम उकळण्याचा प्रकार उघडकीस आला असून, लाचलुचपत प्रतिबंधक विभागाच्या (ACB) सापळ्यात दोन जण अडकले आहेत. योगेश ईश्वरलाल संघवी (स्टॅम्प विक्रेता) आणि त्यांचा भाऊ प्रशांत ईश्वरलाल संघवी यांच्यावर गुन्हा दाखल करण्यात आला आहे.
मिळालेल्या माहितीनुसार, तक्रारदार हे 15 मार्च 2026 रोजी जामनेर-पाचोरा रोडवरील प्रशांत झेरॉक्स येथे 500 रुपयांच्या दराचे 10 स्टॅम्प खरेदीसाठी गेले होते. त्यावेळी 5,000 रुपयांच्या स्टॅम्पसाठी 5,500 रुपये देण्याची मागणी करण्यात आली. शासकीय दरापेक्षा 50 रुपये जादा दराने प्रत्येक स्टॅम्प देण्याचा आग्रह धरत ही रक्कम कमी होणार नसल्याचे संघवी यांनी स्पष्ट केले.
यानंतर तक्रारदार यांनी ही बाब जळगाव लाचलुचपत प्रतिबंधक विभागाकडे (ACB) मांडली. दरम्यान, जळगाव एसीबीने आज 17 मार्च 2026 रोजी सापळा रचून तक्रारीची पडताळणी केली असता, योगेश संघवी यांनी पुन्हा 500 रुपयांची अतिरिक्त मागणी केल्याचे निष्पन्न झाले. यावेळी त्यांच्या सांगण्यावरुन त्यांचे भाऊ प्रशांत संघवी यांनी पंचासमक्ष ही 500 रुपयांची लाच रक्कम स्वीकारली. या प्रकरणी दोघांविरुद्ध पाचोरा पोलीस स्टेशनमध्ये गुन्हा दाखल करण्यात आला असून पुढील तपास सुरु आहे.
यांनी केली कारवाई –
लाचलुचपत प्रतिबंधक विभाग जळगावचे पोलीस उपधीक्षक योगेश ठाकूर यांच्या नेतृत्वात पोलीस निरीक्षक हेमंत नागरे, पो.अं. बाळू मराठे, पो.अं. भूषण पाटील, तपास अधिकारी स्मिता नवघरे यांनी ही सापळा कारवाई केली.
