जळगाव : जळगाव महापालिका निवडणुकीचा निकाल जाहीर झाला आहे. यामध्ये ७६ जागांपैकी महायुतीने तब्बल ७० जागांवर विजय मिळविला आहे. दरम्यान उमेदवारांच्या अनामत रकमेबाबत धक्कादायक आकडेवारी समोर आली आहे. निवडणुकीच्या रिंगणात उतरलेल्या एकूण ३२१ उमेदवारांपैकी निम्म्याहून अधिक, म्हणजेच १६७ उमेदवारांना आपली अनामत रक्कम वाचवण्यात अपयश आले आहे.
यामध्ये अपक्षांची संख्या मोठी असली तरी, प्रमुख राजकीय पक्षांमध्ये राष्ट्रवादी (शरद पवार), काँग्रेसला सर्वाधिक फटका बसल्याचे चित्र आहे. निवडणुकीच्या मैदानात नशीब आजमावणाऱ्या ३२१ उमेदवारांपैकी तब्बल १६७ उमेदवारांना मतदारांनी साफ नाकारले आहे. नियमानुसार आवश्यक असलेली किमान मते न मिळाल्याने या सर्वांची अनामत रक्कम आता पालिकेच्या तिजोरीत जमा झाली आहे.
कोणाची डिपॉझिट जप्ती
माजी नगरसेवक चेतन सनकत, अशोक लाडवंजारी, सुनील माळी, काँग्रेसचे विशाल पवार, राष्ट्रवादीचे संग्राम सूर्यवंशी, अपक्ष अॅड. सत्यजित पाटील यांच्यासह १६७ जणांची डिपॉझिट जप्त झालेली आहे.
महापालिकेची ५५ कोटींची कमाई
निवडणूक प्रक्रियेदरम्यान आणि कर वसुलीच्या मोहिमेमुळे महापालिकेच्या तिजोरीत ५५ कोटी रुपयांची वसुली झाली आहे. मागील वर्षी ही वसुली १०२ कोटी रुपये होती.यंदा प्रशासनाने १० टक्के वाढीसह ११२ कोटींचे उद्दिष्ट ठेवले असून एकूण मागणी २०० कोटींच्या घरात आहे. जप्त झालेली अनामत रक्कम ही या महसुलात भर टाकणारी ठरेल.
