होळीनिमित्त मुंबई येथून उत्तर भारतासाठी ३० विशेष गाड्या धावणार; जळगावातील प्रवाशांनाही फायदा

मुंबई । होळीनिमित्त रेल्वे गाड्यांमध्ये प्रवाशांची मोठी गर्दी दिसून येते. याच पार्श्वभूमीवर रेल्वे प्रशासनाने विविध भागातून स्पेशल गाड्या चालविण्याचा निर्णय घेतला आहे. यामध्ये रेल्वेनं लोकमान्य टिळक टर्मिनस (LTT), मुंबई येथून उत्तर भारतासाठी ३० अतिरिक्त विशेष गाड्यांची घोषणा केली असून यामध्ये नवीन फेऱ्यांसह सध्या सुरू असलेल्या काही गाड्यांच्या सेवांचा विस्तार करण्यात आला आहे.

नवीन विशेष गाड्यांच्या ८ फेऱ्या
रेल्वेने मुंबई ते सुलतानपूर आणि वाराणसी दरम्यान विशेष वातानुकूलित गाड्या जाहीर केल्या आहेत:
मुंबई – सुलतानपूर एसी विशेष (४ फेऱ्या): गाडी क्र. ०४२११ मुंबईतून २७ फेब्रुवारी आणि ३ मार्च रोजी दुपारी २:३५ वाजता सुटेल. तर परतीची गाडी (०४२१२) २६ फेब्रुवारी आणि २ मार्च रोजी सुलतानपूरहून सुटेल.
मुंबई – वाराणसी एसी विशेष (४ फेऱ्या): गाडी क्र. ०४२२५ मुंबईतून २६ फेब्रुवारी आणि २ मार्च रोजी दुपारी २:३५ वाजता सुटेल. परतीची गाडी (०४२२६) २५ फेब्रुवारी आणि १ मार्च रोजी वाराणसीहून सुटेल.
थांबे: या गाड्या ठाणे, कल्याण, नाशिक रोड, भुसावळ, इटारसी, जबलपूर, लखनौसह महत्त्वाच्या स्थानकांवर थांबतील.

२२ गाड्यांच्या सेवांचा विस्तार
प्रवाशांचा प्रतिसाद पाहून रक्सौल, सहरसा आणि धनबादसाठी चालवल्या जाणाऱ्या विशेष गाड्यांच्या मुदतीत वाढ करण्यात आली आहे:
१. मुंबई – रक्सौल विशेष (८ फेऱ्या): १२ मार्च ते २ एप्रिल दरम्यान दर गुरुवारी धावेल.
२. मुंबई – सहरसा विशेष (८ फेऱ्या): ८ मार्च ते २९ मार्च दरम्यान दर रविवारी धावेल.
३. मुंबई – धनबाद विशेष (६ फेऱ्या): १२ मार्च ते २६ मार्च दरम्यान दर गुरुवारी धावेल.
महत्त्वाची टीप: विस्तारित गाड्यांच्या वेळापत्रक, थांबे आणि डब्यांच्या रचनेत कोणताही बदल करण्यात आलेला नाही.

आरक्षण कधी सुरू होणार ?
गाडी क्र. ०५५५८, ०५५८६ आणि ०३३८० साठी आरक्षण २० फेब्रुवारी २०२६ पासून सुरू झाले आहे.
एसी होळी विशेष गाडी क्र. ०४२११ आणि ०४२२५ साठी आरक्षण २२ फेब्रुवारी २०२६ पासून सुरू होईल.
प्रवासी आपले आरक्षण आयआरसीटीसीच्या (IRCTC) अधिकृत संकेतस्थळावर किंवा रेल्वेच्या आरक्षण खिडकीवर करू शकतात. प्रवाशांनी अधिक माहितीसाठी ‘NTES’ ॲप किंवा रेल्वेच्या चौकशी संकेतस्थळाचा वापर करावा, असे आवाहन रेल्वे प्रशासनाने केले आहे.