मुक्ताईनगर । मध्य प्रदेशातून मुक्ताईनगरकडे भरधाव जाणाऱ्या कंटेनरने दुचाकीला मागून धडक दिली. त्यात पिंप्रीपंचम (ता. मुक्ताईनगर) येथील माजी सरपंच रघुनाथ नाना पाटील (वय ७०) यांचा जागीच मृत्यू झाला. मुक्ताईनगर ते बऱ्हाणपूरकडे जाणाऱ्या महामार्गावर नायगाव फाट्याजवळील उड्डाणपूल परिसरात घडली असून याप्रकरणी मुक्ताईनगर पोलिसांत अपघाताची नोंद करण्यात आलीय.
पिंपरीपंचम (ता. मुक्ताईनगर) येथील माजी सरपंच रघुनाथ पाटील हे टीव्हीएस कंपनीच्या दुचाकी (एमएच.१९-बीएफ.६८३) ने मुक्ताईनगरकडे जात होते. नायगाव फाट्याजवळील उड्डाण पुलाजवळ मध्य प्रदेशकडून मुक्ताईनगरकडे जाणाऱ्या ट्रक कंटेनरने (एचआर.३८-एडी.५१०९) ने त्यांना मागून धडक दिली.
विजय महेश्वर बैठक (रा. लखनीतपुरमेसपट्टी ता. उजियारपूर जि. समस्तीपुर बिहार) हा कंटेनर चालवत होता. या अपघातात कंटेनरचे चाक रघुनाथ पाटील यांच्या डोक्यावरुन गेल्याने त्यांचा जागीच मृत्यू झाला. भगवान तुकाराम चौधरी यांच्या फिर्यादीवरून मुक्ताईनगर पोलिसांत अपघाताची नोंद झाली. तपास हवालदार लीलाधर भोई हे करत आहेत.
