चाळीसगाव (प्रतिनिधी) :- चाळीसगाव विधानसभा मतदारसंघातील महायुतीमधील भारतीय जनता पक्षाचे उमेदवार आमदार मंगेश चव्हाण यांच्या प्रचाराला जोरदार प्रतिसाद मिळत आहे. मतदारसंघातील विकास हेच आपल्या कामाची पावती असल्याचे भाजप उमेदवार आमदार मंगेश चव्हाण यांनी म्हटले आहे.
आमदार मंगेश चव्हाण यांनी सांगितले की, छत्रपती शिवाजी महाराज चौक सुशोभीकरण करण्यासाठी प्रशासकीय मान्यता ५ कोटी आहे. ३ कोटी ७६ लाख रुपयांचीच निविदा मंजूर झाली आहे. त्यात राजमुद्रा शिल्प व ट्रॅफिक आयलँड संदर्भातील कामकाजावर फक्त २५ लाख रुपये खर्च झाले आहेत, उर्वरित खर्च हा रेल्वेस्थानक रोड, सेंट्रल बँकपासून छत्रपती शिवाजी महाराज चौकापर्यंत रस्ता जोड, रस्ता चौक काँक्रिटीकरण गटारीचे आरसीसी पाईप, धापे, डिव्हायडर, तस्सम पेवर ब्लॉक, फुटपाट, पथदिवे, रोड फर्निचर आदी कामांसाठी करण्यात येत आहे. याबाबत आरोप करणाऱ्यांनी छत्रपती शिवाजी महाराज चौकात माफी मागावी, असे आवाहन मंगेश चव्हाण यांनी जाहीर सभेत केले आहे. या सर्व कामांची यादी शासनाच्या वेबसाईटवर उपलब्ध असल्याचे ते म्हणाले.
चाळीसगाव मतदार संघातील अपक्ष उमेदवार सुनील ताराचंद मोरे यांनी भाजप महायुतीचे उमेदवार आमदार मंगेश चव्हाण यांना पाठिंबा जाहीर केला आहे. आमदार चव्हाण यांनी आदिवासी समाजासाठी विकास कामे केली आहेत. यामुळेच माघार घेतली आहे. आमदार मंगेश चव्हाण यांनीदेखील आदिवासी समाजच्या विकासासाठी कटिबद्ध असल्याचे आश्वासन दिले.
