जळगाव । जळगावात लव्ह जिहादचा प्रयत्न फसला आहे. तरूणीला प्रेमाच्या जाळ्यात ओढून तिला बुरखा घालण्यास सक्ती करून जीवेठार मारण्याची धमकी दिल्याचा प्रकार जळगावातून समोर आला असून याप्रकरणी रामानंद नगर पोलीस ठाण्यात दोन जणांविरोधात गुन्हा दाखल करण्यात आला आहे. यातील एकाला अटक करण्यात आली आहे.
याबाबत अधिक माहिती अशी की, यावल तालुक्यातील एका गावात २२ वर्षीय तरूणी ही आपल्या कुटुंबियांसह वास्तव्याला आहे. चोपडा येथील एका फार्मसी महाविद्यालयात शिकत आहे. दरम्यान फरहान हकीम खाटीक रा. किनगाव ता.यावल हा देखील फार्मसी कॉलेजात शिक्षण घेत असल्याने तरूणी आणि फरहान हे दोघे एकाच बसमधून प्रवास करत होते. या १ जानेवारी २०२२ ते ४ जून २०२५ या कालावधीत स्नॅप चॅटवरून ओळख निर्माण झाली. स्नॅप चॅटींगच्या माध्यमातून फरहानने पिडीत तरूणीला “तू माझे प्रपोज स्विकार करत नाही तर मी आत्महत्या करेल” अशी धमकी दिली.
दरम्यान बुधवारी ४ जून रोजी पिडीत तरूणी ही जळगावातील डी मार्ट येथे खासगी कामासाठी गेली होती . त्यावेळी फरहान हकीम खाटीक आणि त्यांचा मित्र जमील कुरेशी दोन्ही रा. किनगाव ता. यावल या दोघांनी तिचा पाठलाग केला. त्यानंतर फरहान खाटीक याने पिडीत मुलीला जबरदस्तीने बुरखा घालण्यास सांगितले, “तु बुरखा नाही घातला तर मी आत्महत्या करेल” अशी धमकी दिली. त्यामुळे घाबरून पिडीत तरूणीने बुरखा घातला व दोघांसोबत डीमार्ट मध्ये खरेदीसाठी गेली. यावेळी तरुणीने पैसे देण्याच्या काऊंटरवर बुरखा काढण्यास सांगितले असता, फरहान याने तू बुरखा काढला तर मी तुला मारुन टाकेल अशी धमकी दिली. त्यावेळी आजूबाजूचे लोकांनी हे वाक्य ऐकून त्यांना संशय आल्याने मोठा जमाव जमा झाला. जमाव जमल्यानंतर तणावाचे वातावरण निर्माण झाले होते. याबाबत डायल ११२ वर कॉल आल्यानंतर रामानंद नगर पोलीस ठाण्यातील कर्मचाऱ्यांनी घटनास्थळी धाव घेतली. त्यानंतर तरुणीसह दोघा तरुणांना त्यांनी पोलीस ठाण्यात आणले. याठिकाणी तरुणीने दिलेल्या तक्रारीवरुन संशयित फरहान हकीम खाटीक (वय २३) व जमील कुरेशी (दोघ रा. किनगाव, ता. यावल) यांच्याविरुद्ध गुन्हा दाखल करण्यात आला असून त्यांना अटक करण्यात आली आहे. तपास उपनिरीक्षक प्रदीप बोरुडे हे करीत आहे.
