जळगाव । बोगस अपंग प्रमाणपत्र सादर करून जिल्हा परिषदेत नोकरी मिळविणे दोघांना भोवले आहे. जिल्हा परिषदेच्या अर्थ विभागातील दोघा कर्मचाऱ्यांचे दिव्यांग प्रमाणपत्र बनावट असल्याचे आढळून आले आहे. याप्रकरणी कार्यकारी अधिकारी मिनल करणवाल यांनी दोघांच्या निलंबनाचे आदेश काढले. या कारवाईने संबंधीत प्रमाणपत्र धारकांच्या गोटात खळबळ माजली आहे.
पाचोरा पंचायत समितीत कार्यरत असलेले वरिष्ठ लेखा सहायक विक्रम सुरेश पाटील आणि धरणगाव पंचायत समितीत कार्यरत असलेले कनिष्ठ लेखा सहायक संतोष लक्ष्मण पाटील अशी निलंबनाची कारवाई करण्यात आलेल्या दोघांची नावे आहेत.
या दोघा कर्मचा-यांची पुनर्तपासणी जळगाव येथील शासकीय वैद्यकीय महाविद्यालय व रुग्णालयात करण्यात आली होती. अद्याप 62 दिव्यांग कर्मचा-यांनी आपले युआयडी सादर केलेले नसून त्यांना पडताळणीसाठी नोटीस बजावण्यात आली आहे.
