जळगाव । आगामी स्थानिक स्वराज्य संस्थांच्या निवडणुकांसाठी राज्यातील सर्वच राजकीय पक्ष तयारीत व्यस्त असून जळगाव जिल्ह्यात शिवसेनेची ताकद वाढली आहे. कारण जिल्ह्यातील अमळनेरमधील भाजपचे माजी आमदार शिरीष चौधरी यांनी उपमुख्यमंत्री एकनाथ शिंदे यांच्या उपस्थितीत मंगळवारी शिवसेनेत प्रवेश केला. त्यांच्या बरोबर जिल्हा परिषदेसह पंचायत समितीचे सदस्य, सभापती तसेच माजी प्रभारी नगराध्यक्ष आणि माजी नगरसेवक शिंदे गटात दाखल झाले. त्यामुळे भाजप मोठा धक्का बसला आहे.
गेल्या काही निवडणुकांमध्ये माजी अपक्ष आमदार शिरीष चौधरी यांचा भाजपला पाठिंबा होता. त्यामुळे आता अमळनेरमध्ये भाजपला मोठा धक्का बसला आहे. चौधरी स्थानिक कार्यकर्त्यांच्या राजकारणाला कंटाळून शिवसेनेत प्रवेश केल्याचे समोर आले आहे. चौधरी यांच्यासह उबाठा गटाचे अमळनेरचे माजी नगरसेवक गुलाब पाटील, माजी शहरप्रमुख प्रवीण पाठक, माजी प्रभारी नगराध्यक्ष अनिल महाजन, माजी सभापती श्रीराम चौधरी, माजी सभापती देविदास महाजन, माजी नगरसेवक पंकज चौधरी, महेश जाधव, किरण बागुल, बाळासाहेब संघनाशिव, साखरलाल महाजन आणि इतर असंख्य पदाधिकाऱ्यांनी हाती भगवा घेत शिवसेनेमध्ये प्रवेश केला. त्यामुळे स्थानिक स्वराज्य संस्थांच्या निवडणुकीच्या तोंडावर शिवसेनेची ताकद वाढली आहे.
या पक्षप्रवेशाच्या कार्यक्रमाला पाणीपुरवठा मंत्री गुलाबराव पाटील, परिवहन मंत्री प्रताप सरनाईक, रोजगार हमी मंत्री भरतशेठ गोगावले, जलसंधारण मंत्री संजय राठोड, आमदार संतोष बांगर, आमदार किशोर आप्पा पाटील, आमदार चंद्रकांत सूर्यवंशी, जिल्हाप्रमख वासुदेव पाटील, शिवसेना सचिव संजय मोरे तसेच शिवसेना पदाधिकारी आणि शिवसैनिक मोठ्या संख्येने उपस्थित होते.
