जळगाव: गेल्या वर्षी नोव्हेंबर महिन्यात झालेल्या अवकाळी पावसाने जळगाव जिल्ह्यातील शेतीचे अतोनात नुकसान झाले होते. या संकटामुळे आर्थिक अडचणीत सापडलेल्या शेतकऱ्यांसाठी आता राज्य शासनाने मदतीचा हात पुढे केला आहे. जिल्ह्याला सर्वाधिक म्हणजेच १० कोटी ४१ लाख १२ हजार रुपयांचा निधी मंजूर करण्यात आला असून, यामुळे सुमारे १०,६५९ शेतकऱ्यांना मोठा दिलासा मिळणार आहे.
८ हजार हेक्टरवरील पिकांचे नुकसान
नोव्हेंबर २०२५ मध्ये झालेल्या अवकाळी पावसाचा आणि गारपिटीचा सर्वाधिक फटका केळी, कापूस, मका, भाजीपाला आणि फळबागांना बसला होता. जिल्ह्यातील सुमारे ८३१४.५३ हेक्टर क्षेत्रावरील पिके पूर्णपणे उद्ध्वस्त झाली होती. काढणीस आलेली पिके मातीमोल झाल्याने शेतकऱ्यांचे आर्थिक गणित कोलमडले होते. या नुकसानीचे पंचनामे पूर्ण झाल्यानंतर आता शासनाने ही आर्थिक मदत जाहीर केली आहे.
डीबीटी (DBT) द्वारे थेट खात्यात जमा होणार रक्कम
या मदतीच्या वितरणात पारदर्शकता राहावी आणि कोणताही मध्यस्थ नसावा, यासाठी शासनाने थेट लाभ हस्तांतरण (DBT) प्रणालीचा अवलंब केला आहे. मंजूर झालेला निधी कोणत्याही कपातीशिवाय थेट शेतकऱ्यांच्या बँक खात्यात जमा केला जाणार आहे.
दरम्यान, अनेकदा मदतीची रक्कम जमा होताच बँका जुन्या कर्जाच्या वसुलीसाठी ती कापून घेतात. मात्र, शासनाने यंदा बँकांना स्पष्ट ताकीद दिली आहे:नैसर्गिक आपत्तीची ही मदत शेतकऱ्यांच्या पुनर्बांधणीसाठी आहे.ही रक्कम कोणत्याही जुन्या कर्जाच्या वसुलीसाठी वळती करू नये.जिल्हाधिकारी आणि तहसीलदार या निर्देशांच्या अंमलबजावणीवर लक्ष ठेवतील.
