जळगाव । जळगाव जिल्ह्यातील १६ नगर परिषदांसह दोन नगर पंचायतींसाठी मंगळवारी रात्री उशिरापर्यंत सरासरी ६५.५८ टक्के मतदान झाल्याची नोंद घेण्यात आली. रात्री ९ वाजेपर्यंत अनेक ठिकाणी मतदारांच्या रांगा लागलेल्या होत्या.
जिल्ह्यातील नगर परिषदांसह नगर पंचायतींसाठी एकूण ४५२ जागांसाठी सुमारे १५६४ उमेदवार निवडणुकीच्या रिंगणात होते. सकाळी मतदानाला सुरूवात होताच पहिल्या दोन-तीन तासांत मतदारांचा उत्साह लक्षणीय दिसून आला. मात्र, त्यानंतर अचानक मतदान केंद्रांवरील गर्दी कमी होत गेली. सकाळी साडेसात ते दुपारी साडेतीन वाजेदरम्यान जिल्ह्यातील एकूण आठ लाख ८१ हजार ५१० मतदारांपैकी तीन लाख ९६ हजार ४०८ मतदारांनी त्यांचा मतदानाचा हक्क बजावला होता. मतदानाची प्रक्रिया सायंकाळी उशिरापर्यंत चालल्यानंतर ६५.५८ टक्के मतदानाची नोंद निवडणूक यंत्रणेने घेतली.
जिल्ह्यातील पालिकानिहाय टक्केवारी
जामनेरमध्ये ६०.६८ टक्के, भुसावळ ५४.९१ एवढे कमी मतदान झाले. यावलमध्ये ७३.१६ टक्के, फैजपूर ७२.९१ टक्के, राजकीय दृष्ट्या चर्चेत असलेल्या पाचोऱ्यात ६८.८२ टक्के, वरणगावमध्ये ७२.७१ टक्के, अमळनेर ६४.४८ टक्के, चाळीसगाव ६२.५८ टक्के, सावदा ६९.९९ टक्के, चोपडा ६७.९७ टक्के, भडगाव ६८.७० टक्के, रावेर ७४.७४ टक्के, धरणगाव ७२.५४ टक्के, पारोळा ७२.८७ टक्के, नशिराबाद ६८.११ टक्के, मुक्ताईनगर ६४.४४ टक्के तर शेंदुर्णीला ६९.८९ टक्के मतदान झाले.
