जळगाव । जळगाव शहरात पोलिसांनी एक महत्त्वाची कारवाई करत चोरीच्या पाच दुचाकींसह एक चोरट्याला अटक केली आहे. दीपक प्रेमसिंग सोळंके (रा. वरठाण, ता. सोयगाव, जि. छत्रपती संभाजी नगर) नावाच्या या संशयित चोरट्याला एमआयडीसी पोलीस ठाण्याच्या पोलीस निरीक्षक संदीप पाटील यांच्या नेतृत्वाखालील पथकाने अजिंठा चौकातून अटक केली.
पोलीस निरीक्षक संदीप पाटील यांना मिळालेल्या माहितीनुसार, जळगाव शहरातील अजिंठा चौफुली परिसरात चोरीची दुचाकी विक्रीसाठी दीपक सोळंके येणार होता. या माहितीचा फायदा घेत पोलीस निरीक्षकांनी गुन्हे शोध पथकाचे राहुल तायडे, चंद्रकांत धनके, योगेश बारी, विशाल कोळी, राहुल रगडे आणि फिरोज तडवी यांचे पथक तयार केले. या पथकाने तांत्रिक विश्लेषण करून रविवार, २२ डिसेंबर रोजी दुपारी ३ वाजता अजिंठा चौफुली परिसरात सापळा रचून संशयित चोरट्याला मुसक्या आवळल्या.
चौकशी दरम्यान, संशयिताने सुरुवातीला उडवाउडवीची उत्तरे दिली, परंतु पोलिसांनी त्याला खाक्या दाखविताच त्याने कबुली दिली. त्याने जिल्हापेठ पोलीस ठाण्याच्या हद्दीतून तीन, छत्रपती संभाजी नगरातून एक आणि अडावद येथून एक अशा पाच दुचाकी चोरल्याची माहिती दिली. पोलिसांनी या दुचाकी जप्त केल्या आणि संशयिताला शहर पोलीसांच्या ताब्यात दिले.
या कारवाईमुळे जळगाव शहरातील दुचाकी चोरीच्या प्रकरणांवर नियंत्रण मिळवण्यात पोलिसांना यश मिळाले आहे. पोलिसांच्या या कारवाईने नागरिकांमध्ये सुरक्षिततेची भावना निर्माण झाली आहे.
