जळगाव । जळगावातील पोलीस दलाच्या कार्यक्रमात मंत्र्याचे खाते बदलण्याचा प्रकार घडला आहे. मंत्री गुलाबराव पाटील यांच्या नावासमोर जलसंपदामंत्री म्हणून उल्लेख करण्यात आल्यामुळे त्याची चांगलीच चर्चा रंगली होती.
जळगाव पोलीस दलातील कार्यक्रमात डिजिटल स्क्रीन बोर्डवर मंत्री गुलाबराव पाटील यांच्या नावासमोर जलसंपदा मंत्री असल्याचे नमूद केले गेले. जलसंपदा मंत्री गिरीश महाजन असताना गुलाबराव पाटील यांच्या नावासमोर जलसंपदा खाते लिहिण्याची पोलीस दलाकडून चूक झाली आहे.
यामुळे जळगाव जिल्हा पोलीस दलाला जळगाव जिल्ह्यातीलच मंत्री असताना सुद्धा मंत्र्यांच्या खात्याचा विसर पडला, अशी चर्चा रंगली. नावासमोर जलसंपदा खाते असल्याबाबत मंत्री गुलाबराव पाटील यांनी सुद्धा प्रतिक्रिया दिली आहे.
गुलाबराव पाटील यांनी काय म्हटले…
पोलीस दलातील कार्यक्रमात झालेल्या प्रकाराबद्दल गुलाबराव पाटील यांनी म्हटले की, पाणीपुरवठा आणि जलसंपदा दोन्ही खाते पाण्याशी संबंधित आहे. यामुळे ही चूक झाली असले. मला त्याचे काहीच वाईट वाटले नाही, असे मंत्री गुलाबराव पाटील यांनी म्हटले.
