जळगाव । शहरातील सुवर्ण बाजारपेठेत सोन्याच्या दराने सोमवारी सकाळी बाजार उघडताच मोठी उसळी घेतली. दसऱ्यापूर्वी सोन्याने केलेला नवा उच्चांक लक्षात घेता ग्राहकांसह सुवर्ण व्यावसायिकांना मोठा धक्का बसला.
आठवड्याच्या पहिल्याच दिवशी सोमवारी सोन्याच्या किमतीत वाढ दिसून आल्याने सोन्याने विक्रमी उच्चांक गाठला आहे. जागतिक बाजारपेठेतील तेजी आणि रुपयाच्या सर्वकालीन निच्चांकी पातळीमुळे ही दरवाढ झाल्याचे जाणकारांचे म्हणणे आहे. एमसीएक्स एक्सचेंजवर सुद्धा सोन्याचा व्यवहार तेजीने सुरू आहे.
जळगावमध्ये शुक्रवारी २४ कॅरेट सोन्याचे दर जीएसटीसह प्रति १० ग्रॅम एक लाख १७ हजार ३१७ रूपयांपर्यंत होते. शनिवारी जेमतेम १०३ रूपयांची वाढ नोंदवली गेल्याने सोन्याचे दर एक लाख १७ हजार ४२० रूपयांपर्यंत पोहोचले. दरवाढीचा वेग मंदावल्याने ग्राहकांसह व्यावसायिकांना काहीसा दिलासा मिळाला. मात्र, सोमवारी सकाळी बाजार उघडताच सोन्याने पुन्हा दणका दिला.
शनिवारच्या तुलनेत तब्बल १९५७ रूपयांनी वाढ झाल्याने सोन्याने एक लाख १९ हजार ३७७ रूपयांपर्यंत मजल मारत नवा उच्चांक प्रस्थापित केला. दसऱ्यापूर्वी सोने एक लाख २० हजार रूपयांच्या उंबरठ्यावर येऊन पोहोचल्याने दिवाळीपर्यंत त्यात आणखी किती वाढ होते, त्याकडे आता सर्वांचे लक्ष लागले आहे.
