जळगाव । जळगाव एमआयडीसी पोलीस स्टेशन हद्दीत झालेल्या गॅस सिलेंडर चोरीच्या प्रकरणाचा अखेर एमआयडीसी पोलिसांनी यशस्वी तपास करून पर्दाफाश केला आहे. मिळालेल्या माहितीनुसार, परिसरातील एका ठिकाणाहून गॅस सिलेंडर चोरी झाल्याची तक्रार दाखल झाली होती. या तक्रारीवरून पोलिसांनी तपासाची चक्रे वेगाने फिरवत दोन आरोपींना अटक केली. त्यांच्याकडून चोरी झालेले ६१ सिलेंडर आणि गुन्ह्यात वापरलेले आयशर वाहन जप्त करण्यात आले आहे. जप्त मालाची एकूण किंमत सुमारे ६ लाख २२ हजार रुपये आहे.
शुक्रवार (दि.14) रोजी फिर्यादी यांनी भारत पेट्रोलियम, जळगाव येथून रिफिल केलेले ३४२ सिलेंडर ट्रकद्वारे एमआयडीसी परिसरात रात्री पार्क केले होते. शनिवार (दि.15) रोजी सकाळी ते वाहन घेण्यासाठी पोहोचले असता ट्रक रस्त्याच्या कडेला उभा दिसला, परंतु त्यातील ६१ सिलेंडर गायब असल्याचे आढळले. चोरी झालेल्या सिलेंडरची किंमत १ लाख २२ हजार रुपये होती. या प्रकरणी एमआयडीसी पोलीस स्टेशनमध्ये गु.र.नं. ८४८/२०२५, कलम ३०३(२) नुसार गुन्हा दाखल करण्यात आला. पोलीस निरीक्षक बबन आव्हाड यांच्या नेतृत्वाखालील पथकाने तपास सुरू करण्यात आला. त्यानंतर गुप्त माहितीच्या आधारे मंगळवार (दि.18) रोजी एमआयडीसी भागात सापळा रचण्यात येऊन मुख्य आरोपी शेख फिरोज शेख याकुब (रा. नशिराबाद, जळगाव) याला ताब्यात घेण्यात आले आहे.
आरोपीच्या चौकशीत त्याने साथीदार सैय्यद मुश्ताक सैय्यद अशपाक (रा. उस्मानिया पार्क, जळगाव) याच्यासह चोरी केल्याची कबुली दिली आहे. आरोपींकडून सर्व 61 सिलेंडर तसेच गुन्ह्यात वापरलेले सुमारे 5 लाख रुपये किमतीचे आयशर वाहन जप्त करण्यात आले आहे. ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी नितीन गणापुरे यांच्या मार्गदर्शनाखाली करण्यात आली. या पथकात पोलीस अधिकारी राहुल तायडे, चंद्रकांत धनके, विजयसिंग पाटील, गणेश शिरसाळे, प्रदीप चौधरी, गिरीश पाटील, प्रमोद, किरण चौधरी, नितीन ठाकुर, किरण पाटील आणि शशिकांत मराठे यांनी सहभाग घेतला.
