जळगाव : हनी ट्रॅप प्रकरणातील संशयित प्रफुल्ल लोढाचे प्रकरण बाहेर आल्यापासून भाजप नेते गिरीश महाजन आणि शरद पवार गटाचे ज्येष्ठ नेते एकनाथ खडसे एकमेकांवर टीका करण्याची एकही संधी सोडताना दिसत नाहीत. यातच एकनाथ खडसेंनी गिरीश महाजन यांच्यावर पुन्हा एकदा निशाणा साधला आहे.
देवाभाऊंचा आशीर्वाद असेपर्यंतच महाजन यांची किंमत आहे. देवेंद्र फडणवीस यांनी डोक्यावरील हात काढल्यावर गल्लीमध्ये एका कुत्र्याच्या मागे जशी १०० कुत्री लागतात, तशी यांची हालत होणार असल्याची बोचरी टीका खडसे यांनी केली आहे.
एकनाथ खडसे यांनी प्रफुल्ल लोढा आणि भाजपचे मंत्री गिरीश महाजन यांचे पूर्वापर घनिष्ठ संबंध असल्याचा आरोप करून हे प्रकरण आणखी तापवले आहे. मागील सर्व हिशेब चुकते करण्यासाठी लोढा प्रकरणावरून दररोज नवीन आरोप करून महाजन यांना डिवचण्याचा प्रयत्नही खडसे यांनी केला आहे.
याला जेलमध्ये टाका आणि त्याच्या मागे इडी लावा, अशातला मी माणूस नाही. लढायचे असेल तर आमने-सामने लढा. आतापर्यंत लढलो तर समोरून लढलो, मागून काड्या केल्या नाही. प्रफुल्ल लोढा हा गिरीश महाजन यांच्या बंगल्यावर नेहमी राहायचा. त्याचे कोणतेच पुरावा देण्याची गरज नाही. ते कुणीही सांगू शकेल. प्रफुल्ल लोढा याने त्याच्याकडे असलेले पुरावे इतरांना देऊ नये आणि तोंड उघडू नये, यासाठीच त्याला वारंवार पोलीस कोठडीत ठेवण्याचा प्रयत्न केला जात आहे. लोढा जामीनावर सुटल्यानंतर त्याच्याकडून सत्य बाहेर आले तर यांचा पर्दाफाश होऊ शकतो, असाही गौप्यस्फोट एकनाथ खडसे यांनी आता नव्याने केला आहे. जळगावमध्ये पत्रकारांशी ते बोलत होते.
