जळगाव । जळगावच्या धरणगाव महावितरण कार्यालयात ‘झिरो वायरमन’ म्हणून ठेकेदारी पद्धतीने काम करणाऱ्या दिलीप देवा भिल या तरुणाचा इलेक्ट्रिक खांबावरून पडून दुर्दैवी मृत्यू झाल्याची घटना आज दि २५ सप्टेंबर रोजी घडली.
दिलीप भील हा धरणगाव शहरातील लोहार गल्ली परिसरात नेहमीप्रमाणे विद्युत दुरुस्तीचे काम करत असताना हा अपघात घडला. नेमका शॉक लागून की तोल जावून पडला, हे मात्र, अद्याप स्पष्ट झालेले नाही. अपघातात गंभीर जखमी झालेल्या दिलीपला सहकाऱ्यांनी तात्काळ जळगाव येथील शासकीय वैद्यकीय महाविद्यालयात नेले, मात्र डॉक्टरांनी त्याला मृत घोषित केले.
दिलीप हा गेल्या १० वर्षांपासून झिरो वायरमन म्हणून काम करत होता आणि तो गारखेडा येथे कुटुंबासोबत राहत होता. त्याच्या अचानक जाण्याने कुटुंबावर दुःखाचा डोंगर कोसळला असून, शोकाकुल आई-वडीलांचा आक्रोश उपस्थितांना भावुक करणारा होता. दिलीप हा कुटुंबाचा एकमेव कमावता सदस्य होता. त्यामुळे एकलव्य संघटनेने या प्रकरणी महावितरणकडून आर्थिक मदतीची ठोस मागणी केली आहे. ही मागणी मान्य न झाल्यास दिलीपचा मृतदेह ताब्यात घेणार नाही, असा इशारा संघटनेने दिला आहे.
