जळगाव । जळगाव शहरातून पुन्हा एक धक्कादायक घटना समोर आली आहे. शिवाजीनगर येथील स्मशानभूमीत सोन्याच्या लालसेपोटी एका महिलेच्या अस्थींची चोरी केल्याचा प्रकार समोर आला आहे. एका आठवड्यात ही दुसरी घटना घडली असून या घटनेनं शहरात खळबळ उडाली आहे. घडलेल्या या घटनेनं
जळगाव शहरातील खडके चाळीत राहणाऱ्या जिजाबाई पाटील यांच्या निधनानंतर त्यांच्यावर छत्रपती शिवाजीनगर स्मशानभूमीत अंत्यसंस्कार करण्यात आले होते. सोमवारी 13 ऑक्टोबर रोजी सकाळी त्यांचे नातेवाईक अस्थी घेण्यासाठी स्मशानभूमीत आले असता, अंत्यसंस्कार केलेल्या जागेवरून डोक्याच्या आणि पायाच्या भागातील राख आणि अस्थी गायब झाल्याचे त्यांच्या लक्षात आले. जिजाबाई पाटील यांच्या अंगावरील सुमारे चार ग्रॅम वजनाचे सोन्याचे दागिने देखील यावेळी चोरट्यांनी लंपास केले होते.
या चोरीच्या पद्धतीत एक विचित्र गोष्ट आढळली. चोरट्यांनी दागिने चोरले असले तरी, जिजाबाईंच्या अंत्यसंस्काराच्या ठिकाणी पंचपक्वान्नाचे भोजनाचे पान ठेवलेले आढळले आहे. या घटनेमुळे जळगावातील स्मशानभूमींची सुरक्षा ऐरणीवर आली असून, स्थानिक प्रशासन आणि पोलीस प्रशासनावर नागरिकांचा संताप वाढताना दिसत आहे.
