जळगाव : जळगाव जिल्ह्याच्या चोपडा तालुक्यातून एक भीषण अपघात झाला आहे. बस आणि कारच्या झालेल्या अपघातात कारमधील तिघांचा जागीच मृत्यू झाल्याची घटना घडली आहे. जळगाव जिल्ह्यात चोपडा तालुक्यातील चोपडा-धरणगाव रस्त्यावर चोपडा सुतगिरणी जवळ ही अपघाताची घटना घडली आहे. कारमधील वाणी कुटुंब जळगाव जिल्ह्यातील यावल तालुक्यात असलेल्या मनू देवीच्या दर्शनासाठी येत असताना हा अपघात झाल्याचं सांगण्यात येत आहे. घटनेची माहिती मिळताच पोलिसांनी घटनास्थळ गाठत पुढील तपास सुरू केला आहे. तर यातील एका जणावर जवळच्या हॉस्पटीलमध्ये उपचार सुरू आहेत.
मिळालेल्या माहितीनुसार, चोपडा-नाशिक ही शिवशाही बस चोपडा बस आगारातून सकाळी सहा वाजता निघाली. दरम्यान, ही बस वाटेत असताना चोपड्यापासून काही अंतरावर असलेल्या सूतगिरणीजवळ समोरून येणाऱ्या कार आणि बसचा जोरदार अपघात झाला. यावेळी कारमधील तिघांचा जागेवर मृत्यू झालाय, तर एक जण गंभीर जखमी झाला असून त्याच्यावर उपचार सुरू आहेत. कारमधील वाणी कुटुंब जळगावमधील मनू देवीच्या दर्शनासाठी जळगाव जिल्ह्यात येत असताना हा अपघात झाल्याचं सांगण्यात येत आहे. या घटनेनं परिसरात मात्र एकच खळबळ उडाली आहे. या घटनेमुळे मृतांच्या कुटुंबियांवर दुखा:चा डोंगर कोसळला आहे.
