जामनेर | जामनेर तालुक्यातून एक मोठी बातमी समोर आली आहे. तालुक्यातील मालदभाडी शिवारात शेतात बेकायदेशीरपणे गांजाची लागवड केल्याचा पर्दाफाश जामनेर पोलिसांनी केला आहे. पोलिसांनी केलेल्या धडक कारवाईत तब्बल १३ किलो ४३० ग्रॅम वजनाचा गांजा मुळासकट जप्त करण्यात आला असून, जप्त करण्यात आलेल्या या मुद्देमालाची अंदाजे किंमत ३ लाख ३५ हजार ७५० रुपये इतकी आहे. या कारवाईमुळे परिसरात मोठी खळबळ उडाली आहे.
अशी झाली कारवाई
जामनेर पोलिसांना ५ नोव्हेंबर रोजी मिळालेल्या गोपनीय माहितीच्या आधारे पोलिसांच्या पथकाने दुपारी सव्वा दोन वाजता मालदभाडी (ता. जामनेर) येथील एका शेतात अचानक छापा टाकला. या कारवाईदरम्यान आरोपी अनिल दगडू पाटील (रा. मालदभाडी, ता. जामनेर) याच्या मालकीच्या शेतात प्रतिबंधित कॅनाबिस वनस्पती अर्थात गांजाची झाडे बेकायदेशीरपणे डोलताना आढळली. पोलिसांनी तातडीने कारवाई करत ही सर्व गांजाची झाडे मुळासकट उपटून जप्त केली.
आर्थिक फायद्यासाठी लागवड
पोलिसांच्या प्राथमिक तपासात असे निष्पन्न झाले आहे की, आरोपीने स्वतःच्या आर्थिक फायद्यासाठी आणि भविष्यात चोरट्या पद्धतीने गांजाची विक्री करण्याच्या उद्देशानेच या शेतात ही बेकायदेशीर लागवड केली होती. या प्रकरणी आरोपी अनिल दगडू पाटील याच्याविरुद्ध ‘एनडीपीएस कायदा १९८५’ मधील कलम ८(ब) आणि २०(अ) अन्वये गंभीर गुन्हा दाखल करण्यात आला आहे.
पोलिसांचे यशस्वी पथक
ही धडक कारवाई पोलीस अधीक्षक श्रीकांत धिवरे, अपर पोलीस अधीक्षक अशोक नखाते, पाचोरा उपविभागाचे उपविभागीय पोलीस अधिकारी बापू रोहम यांच्या मार्गदर्शनाखाली; जामनेर पोलीस स्टेशनचे पोलीस निरीक्षक निवृत्ती बोऱ्हाडे, पोलीस उपनिरीक्षक अशोक कोकाटे, पोलीस उपनिरीक्षक कृष्णा सोळुंके, ग्रे.पो.उपनिरीक्षक जयसिंग राठोड आणि जामनेर पोलिसांच्या पथकाने यशस्वीरीत्या पार पाडली. शेतातच गांजाची शेती करून तो चोरट्या मार्गाने विकण्याचा हा प्रयत्न पोलिसांच्या सतर्कतेमुळे उधळला गेला असून, तालुक्यात या कारवाईची जोरदार चर्चा सुरू आहे.
