दिलासादायक बातमी! महाराष्ट्रात काही तासांत मान्सूनची एंट्री, ‘या’ जिल्ह्यांना अलर्ट; वाचा हवामानाचा अंदाज

मुंबई । महाराष्ट्र्रातील नागरिकांसाठी दिलासादायक बातमी असून नैऋत्य मोसमी वाऱ्यांनी (मॉन्सून) वेगाने आगेकूच करत गोव्यात धडक दिली आहे. पुढील काही तासांत महाराष्ट्रातही त्याचे आगमन होण्याची शक्यता भारतीय हवामान विभागाने व्यक्त केली आहे. त्यामुळे उकाड्याने त्रस्त झालेल्या नागरिकांना मोठा दिलासा मिळणार असून, राज्यात अनेक ठिकाणी पावसासाठी पोषक वातावरण तयार झाले आहे. आज कोकणात उष्ण व दमट हवामानाची शक्यता आहे. तर सातारा, कोल्हापूर या जिल्ह्यांच्या घाटमाथ्यावर जोरदार सरींची शक्यता असल्याने येलो अलर्ट हवामान विभागाने दिला आहे.

हवामान विभागाच्या ताज्या अंदाजानुसार, आज मुंबईसह उत्तर कोकणातील ठाणे, पालघर या जिल्ह्यांत उष्ण आणि दमट हवामानाची शक्यता आहे. दुसरीकडे सातारा आणि कोल्हापूर जिल्ह्यांच्या घाटमाथ्यावर जोरदार पावसाच्या सरी कोसळण्याची शक्यता असल्याने भारतीय हवामान विभागाने ‘येलो अलर्ट’ जारी केला आहे. राज्यातील इतर अनेक भागांत मेघगर्जना, विजांचा कडकडाट आणि ताशी वेगाने वाहणारे वारे यांसह पावसाची शक्यता व्यक्त करण्यात आली आहे.

दरम्यान, मॉन्सूनने केरळमध्ये ४ जून रोजी प्रवेश केला. यंदा त्याचे केरळमधील आगमन नेहमीपेक्षा तीन दिवस उशिरा झाले. शुक्रवारी (५ जून) मॉन्सूनने गोव्याचा काही भाग व्यापला असून, पूर्व-मध्य अरबी समुद्र, कर्नाटक, तमिळनाडू तसेच बंगालच्या उपसागरातील आणखी काही भागांमध्येही प्रगती केली आहे.

हवामान विभागाच्या माहितीनुसार, मॉन्सूनची सीमा सध्या पणजी, बंगळूर, सालेम ते पंबन बेट या भागांपर्यंत पोहोचली आहे. पुढील तासांत तळ कोकणासह महाराष्ट्रातील काही भागांमध्ये मॉन्सूनच्या पावसाची सुरुवात होण्याची शक्यता आहे. राज्यातील शेतकरी आणि नागरिकांचे लक्ष आता मॉन्सूनच्या आगमनाकडे लागले असून, आगामी काही दिवसांत पावसाचा जोर वाढण्याचा अंदाज व्यक्त केला जात आहे.

उत्तर महाराष्ट्रात कधी पोहोचणार?

महाराष्ट्रात मान्सून प्रवेश करणार असला, तरी उत्तर महाराष्ट्राचा विचार करता जळगाव, धुळे आणि नंदुरबार जिल्ह्यांत आगामी १६ ते २१ जून दरम्यान मान्सून दाखल होण्याची दाट शक्यता हवामान अभ्यासकांनी वर्तवली आहे. दरम्यान, जळगाव जिल्ह्यात आजपासून पुढील दोन दिवस मान्सूनपूर्व पावसाचा इशारा देण्यात आला आहे. यामुळे उकाड्याने हैराण झालेल्या जळगावकरांना दिलासा मिळण्याची शक्यता आहे.